இன்று இரண்டாவது டெஸ்ட் வெற்றி பெறுமா இந்திய அணி?

கொழும்பு,ஜுலை26

இலங்கையில் சுற்றுப்பயணம் மேற்கொண்டுள்ள இந்திய கிரிக்கெட் அணி இலங்கை அணிக்கு எதிராக 3 போட்டிகள் கொண்ட டெஸ்ட் தொடரில் பங்கேற்று வருகிறது. இதில், நடந்து முடிந்த முதல் டெஸ்ட் தொடரில் தோல்வியை சந்தித்து 10 என்ற கணக்கில் பின் தங்கியுள்ளது இந்திய அணி.

இந்நிலையில், இந்தியாஇலங்கை அணிகள் மோதும் 2வது டெஸ்ட் போட்டி கொழும்பில் இன்று தொடங்குகிறது.முதல் டெஸ்டில் மோசமாக தோற்றதால் 2வது டெஸ்டில் பதிலடி கொடுக்க வேண்டிய நிலைமை இந்தியாவுக்கு உள்ளது. அதோடு தொடரை சமன் செய்ய வெற்றி பெற வேண்டிய கட்டாயமும் உள்ளது. இலங்கை அணியின் உலக சாதனையாளர் முத்தையா முரளிதரன் டெஸ்டில் இருந்து ஓய்வு பெற்றுள்ளதை அடுத்து, அந்த அணியின் சிறந்த வேகப்பந்து வீச்சாளரான மலிங்காவும் காயம் காரணமாக விலகியுள்ளார். இதனால் அடுத்து வரும் 2வது மற்றும் 3வது டெஸ்ட் தொடரில் இந்திய அணி வெற்றி பெறுவதற்கான வாய்ப்புகள் உள்ளன.

முரளிதரனுக்கு பதிலாக சுழற்பந்து வீச்சாளர் அஜந்தா மெண்டிஸ் அணியில் சேர்க்கப்பட்டுள்ளார். முதல் டெஸ்ட்டில் உலகின் தலைசிறந்த பேட்டிங் வரிசையை கொண்ட இந்திய அணி ""பாலோஆன்'' ஆகி தோற்றது வருத்தத்திற்குரியது.

ஷேவாக் ஒருவர் மட்டுமே சிறப்பாக ஆடி சதம் அடித்தார். 2வது இன்னிங்சில் தெண்டுல்கர், லட்சுமண் போராடினார்கள்.

ஜாகீர்கான், ஸ்ரீசந்த் இல்லாததால் இந்திய அணி பந்து வீச்சில் பலவீனமாக காணப்படுகிறது. இதேபோல முன்னணி சுழற்பந்து வீரரான ஹர்பஜன்சிங் பந்துவீச்சும் எடுபடவில்லை.

பந்துவீச்சை சரிகட்ட பேட்ஸ்மேன் சிறப்பாக விளையாட வேண்டிய நெருக்கடியிலுள்ளது இந்திய அணி.

இலங்கை அணியின் துணை கேப்டனாக இருந்த முரளிதரன் டெஸ்ட் போட்டிகளில் இருந்து ஓய்வு பெற்றதால், அணியின் முன்னணி பேட்ஸ்மேன் மஹேளா ஜெயவர்த்தனே துணை கேப்டனாக நியமிக்கப்பட்டுள்ளார்.

34வது முறை...

இரு அணிகளும் இன்று மோதுவது 34வது டெஸ்ட் போட்டியாகும். இதுவரை நடந்த 33 டெஸ்டில் இந்தியா 12 போட்டியிலும், இலங்கை 6 போட்டியிலும் வெற்றி பெற்றன. 14 டெஸ்ட் ""டிரா'' ஆகியுள்ளது.

இந்திய நேரப்படி காலை 10 மணிக்கு தொடங்கும் இந்தப்போட்டி டென்ஸ் ஸ்போர்ட்ஸ் டெலிவிசனில் நேரடியாக ஒளிபரப்பு செய்யப்படுகிறது.

இந்தியா அணி விவரம் : டோனி (கேப்டன்), ஷேவாக், காம்பீர், டிராவிட், தெண்டுல்கர், வி.வி.எஸ்.லட்சுமண், யுவராஜ்சிங், ஹர்பஜன்சிங், இஷாந்த்சர்மா, அபிமன்யூ மிதுன், ஒஜா, சுரேஷ் ரெய்னா, அமித் மிஸ்ரா, முரளிவிஜய், முனாப்பட்டேல்.

இலங்கை அணி விவரம்: சங்ககரா (கேப்டன்) தில்சான், பரண விதனா, ஜெயவர்த்தனே, மேத்யூஸ், சமரவீரா, பிரசன்னா ஜெயவர்த்தனே, மெண்டீஸ், பெர்னாண்டோ, வெலுகேந்திரா, ஹெராத், கண்டாம்பி, தமிகா பிரசாத், ரந்தீவ் திரிபானே நுவன் பிரதீப்.